E RECÓRDOVOS... QUE PODEDES SOÑAR EN CORES

Moitas veces teño pensado que as cores dos libros materiais que caen nas nosas mans poden atraparnos entrando "polos ollos".
Bonitos soños...










EU SON SULEIMÁN. ANTONIO LOZANO

Elixín este texto para o alumnado de 2º e 3º ESO porque creo é un libro que impacta. E non me equivoquei, impresionoulles a todos e encantoulles.
Narrado por un xove inmigrante que está no noso país e conta como foi o seu periplo desde que fuxiu buscando un futuro mellor en Europa e percorreu nun autobús unha gran distancia chea de perigos, cruzando o Sáhara. Miles e miles de  Km xunto con outros compañeiros ata un desenlace final no que non se consigue o obxectivo perseguido...
Un libro duro, impactante, bo para reflexionar sobre os medos, as dificultades, os soños... que teñen miles de persoas que con valentía buscan unha vida nova na que ás veces só atopan a incomprensión, a soidade e a explotación. Un texto tamén que ofrece un raio de esperanza.
Excelente para reflexionar cos rapaces sobre os dereitos humanos.

LA LECCIÓN DE AUGUST. PALACIO

Foi un pouco accidentada a reunión deste libro posto que tivemos que facer varios cambios debido a unha excursión, algúns alumnos non se enteraron... así que non tivemos moita concurrencia esta vez aínda que sei que lles encantou porque todos piden xa ler o segundo libro deste autor.
Penso que este texto, que xa utilicei co alumnado en varias ocasións, exerce un embruxo sobre eles pola figura do protagonista e polo ameno modo de ser contada a historia. Na reunión atopeime coa afirmación dunha alumna, gran lectora, que dixo era o libro que máis lle gustara na súa vida.
La lección de August sempre é unha aposta segura para falar co alumnado de 1º ciclo.


A CASA DO MEDO. A FERNÁNDEZ PAZ.

Foron moi distintas as opinións escoitadas no grupo 1 de 1º de Eso sobre este libro póstumo de A. Fernández Paz. Xa leran Cartas de inverno e todos dixeron que lles gustara moito máis que o proposto en Balbordo.
Deste texto comentamos o misterio que hai desde o comezo, falamos dos elementos fantásticos da historia, do protagonista, que lembra o que lle pasou na súa infancia. Portas, un amuleto, bosques cunha maldición... son algúns dos elementos desta historia editada en rodeira.
Non se poñían de acordo no que lles gustara e o que non polo que houbo opinións moi diversas sobre este libro.

BALBORDO XANEIRO PAIS-PROFES... LA RIDÍCULA IDEA DE NO VOLVER A VERTE (ROSA MONTERO)


Recordo ler esta novela de Rosa Montero hai anos como un texto que me impactou; por iso a propuxen para Balbordo.
Os detalles da biografía de M. Curie son recreados pola imaxinación de Rosa Montero, que tamén intercala con aqueles datos algúns aspectos personais da súa propia biografía (en relación coa enfermidade e morte do seu home).
A valentía de Curie, a súa intelixencia, a paixón por vivir e descubrir... sitúana como unha muller excepcional para a época que lle tocou vivir. Igual que lle sucedeu a outras mulleres, os sesus logros profesionais chegaron tras esforzos moi costosos para demostrar unha valía que (en moitoss casos) se fose un home se daría por suposto e non habería xa necesidade de loita.
O carácter paixoal da científica obsérvase, por exemplo, noutra relación que resultou escandalosa para a súa época: anos despois da morte do esposo ligouse sentimentalmente a un home casado (tamén científico). Outros aspectos tratados na obra son por exemplo a relación coas súas fillas, a estreita complicidade co seu home, a insoportable dor tras a morte, as dificultades económicas, as loitas incansables, a precariedade no traballo... foron aspectos que comentamos con moita calma na reunión-cea de comenzo de ano.
Ó final da novela vai o diario que M. Curie redactou tras a morte do esposo.

MARTÍN GRIS. ZURIÑE AGUIRRE. EN BALBORDOBIS


Na editorial Fun Readers está editado este fabuloso álbum de Zuriñe Aguirre do que falamos no grupo de BalbordoBis contando coa axuda do Departamento de Orientación do centro.
Martín é un neno sempre preocupado polo que lle poda pasar e por como reaccionarán os que o rodean. Inquiétalle que lle podan saír ramas, por exemplo, que lle medre tremendamente o nariz... pero para todos os seus medos a súa nai ten unha estupenda resposta. 
Un fermoso canto ó respecto e ás diferenzas.


E todos rematamos falando en BalbordoBis dos nosos medos, das inquedanzas, dos sentimentos que nos provocou a lectura e as imaxes...
Os rapaces contarán a súa opinión...

OUTRA LECTURA EN PMAR: ¿QUÉ SERÁ DE TI? ALEXANDRA/ DANIEL MIZIELINSCY

Que ben o pasamos comentando este álbum! Déunos para falar, rir, imaxinar, sorprendernos, descubrir...comentando as distintas profesións que aparecen nel.



Neste libro expóñense diferentes traballos e profesións do máis orixinal e divertido.


Os adxectivos que máis usaron para resumir o texto poposto foron: curioso, ameno e moi moi interesante.


E, de paso..., ocurríronsenos varias profesións que serían moi entretidas.

UNHA LECTURA PARA O GRUPO 4º ESO: EUROPA EXPRESS. ANDREA MACEIRAS


Añadir leyenda
Benvida ao Clube de Lectura de 4ºESO
 Inauguramos este clube de lectura coa obra de  Andrea Maceiras Europa Exprés. O libro conta a historia dunha panda de amigos que ao rematar 2º de Bacharelato viaxan  por Europa en Interrail. Dez anos despois un dos personaxes atopa nunha postal información que lle causará unha grande impresión e decide organizar unha festa de reencontro cos compañeiros e compañeiras de viaxe.
Todos os alumnos que participaron estiveron de acordo en destacar que é un libro fácil de ler, intrigante e que consegue atrapar ao lector. En canto aos personaxes que máis e menos gustaron as opinións foron dispares, aínda que Óscar foi un dos preferidos.
 Houbo tempo para  falar do valor da amizade, da presenza do amor e da súa ausencia, do peso da culpa, algúns dos temas desta novela.
En resumo, esta primeira experiencia do clube de lectura de  4º ESO  resultou satisfactoria. Agardemos que a seguinte proposta lectora tamén o sexa. Seguiremos en contacto.


(Selena González Anseras)

DIARIO DE A FRANK.

Propuxen este libro para o grupo de alumnos de 2º Eso e algúns de 3ª porque unha das rapazas do Club lera na Biblioteca esta novela gráfica (que adxunto na imaxe) e emocionouna tanto que pediu lésemos no grupo o diario. 
É un libro que impresiona ós adolescentes, moitos anos despois dos sucesos vitais narrados.
A voz de A. Frank escoitouse nas reflexións do alumnado, que comentou os episodios do diario, as anécdotas, a vida afogada que se agocha nunhas páxinas cheas de esperanza, forza e á vez desolación... Gustoulles que lles contase como era a casa de A. Frank, convertida nun museo no que tiven ocasión de estar e apreciar a agobiante situación na que se atopaban os seus habitantes.
Lérono en Balbordo e... a continuación foi un libro que pasou por moitas outras mans de alumnado doutros grupos e cursos.
Sempre me pareceu unha obra que marca.

EL RELOJ MECÁNICO. PHILIP PULLMAN

Elixín esta obra de P. Pullman para comezar co segundo grupo de alumnos de 1ºESO de Balbordo porque a súa brevidade e o derroche de fantasía pareceume un modo idóneo de introducirnos na primeira práctica de falar con outros da experiencia da previa lectura individual. A obra gustoulles! 
O personaxe do que máis se falou foi do príncipe Florian e dos sucesos que lle acontecen. Tamén tratamos o comportamento doutros protagonistas deste texto (o novelista, Gretl...). 
Penso que é un libro moi ameno, de lectura fácil e tan imaxinativo como a engranaxe dun vello reloxio, que cando se pon en marcha arrrastra canda el unha chea de pequenas pezas. Nesta novela hai realidade que se torna ficción, imaxinación que se volve real, historia narrada que se convirte en pesadelo... e unha certa dose de maxia! Tamén comentaron que nalgunha páxina se pasa algo de medo...


LA LECCIÓN DE AUGUST. PALACIOS

Cando os alumnos de 1ºEso subiron os primeiros días á Biblioteca, unha das alumnas (do Club de Lectura) comezou, espontaneamente a falarlles ós outros deste libro que a maioría non coñecía. Tanto lles gustou o que ela contou que decidín elixilo como primeira lectura para un dos grupos de 1ºESO do Club de lectura. A sinxela narración do texto apórtalle á novela gran amenidade ó presentarnos un mesmo suceso desde distintos puntos de vista dos implicados. Ademais, o tema debería interesarnos a todos posto que as dificultades que o protagonista sofre, debido a unha deformidade física que condiciona toda a súa existencia, é unha historia totalmente crible.

Os rapaces de 1ºESO falaron de como August vai ó Instituto e alí  enfróntase a un inicial rexeitamento da maioría dos adolescentes (fundamentalmente sinten curiosidade pero fanlle o silenzo ó seu paso) con algunhas excepcións, que lle mostrarán un verdadeiro cariño. Tamén se referiron á amizade desinteresada e á crueldade... Tamén falamos da familia, que sempre o protexera e mimara, que é vista fundamentalmente na súa directa relación cos seus pais e a súa irmá (que o adora pero que, á vez, se sinte mal polas circunstancias do seu irmán).
Queren ler a segunda parte.


TRES LECTURAS PARA NOVEMBRO EN 1º E 2º/3º ESO

GRUPO PROFESORES-PAIS: TRES DÍAS Y UNA VIDA. LEMAITRE

Moitos dos do grupo de pais e profesores xa leramos varias novelas de P. Lemaitre (Rosy&Jhon, Irene, ÁlexVestido de noviaNos vemos allá arriba) e o comentario xeral foi que é un autor que atrapa ó lector con facilidade.
Esta historia versa sobre o arrebato de ira dun adolescente que o leva a cometer unha acción deleznable que o perseguirá continuamente nos seus pensamentos nos anos sucesivos. Asistimos, pois, ó "caos psicolóxico" no que se  asenta a vida do xoven como consecuencia de dito acto.  Foi un aspecto dos que falamos, ademais do comportamento da familia, do entorno, o azar, as voltas da vida... Coincidimos tamén en que a maestría do texto reside en que mantén a nosa atención durante moitísimas páxinas sen que a acción avance considerablemente. E tamén nos referimos con detemento ó impredicible final.
O peso da culpa, dos erros, das malas decisións, do entorno... todo está maxistralmente retratado en Tres días y una vida, novela que comentamos na Reunión-cea de Balbordo para inaugurar o curso.

GRUPO PMAR: REFUGIADA. La Odisea de una familia. TRENFUGIADOS.



Falamos de dous libros que impresionaron ós alumnos pero que elixín precisamente porque contrastan moito polo tono e as ilustracións aínda que aborden a mesma temática.
O primeiro, en tonos azul claro e escuro, con imaxes moi sinxelas pero trazos impactantes pola súa grande expresividade... reflicte perfectamente a anguria dunha nena que non entende que debe marchar dun fogar acolledor para percorrer un espazo descoñecido, ameazante e inhóspito. Masas de xente, desprazamentos e fundamentalmente dor, moita dor é a transmitida por este álbum de Tessa Juliá Dinarès e Anna Gordillo editado en  La Galera.
O segundo álbum que comentamos: trenfugiados (de José Campanari Evelyn Daviddi, en La Fragantina) é moito máis doce ó tratar a mesma problemática. É tamén un álbum impresionante e solidario. Neste caso, as conversacións duns nenos  sobre levar comida ó cole para os "trenfugiados" e os comentarios sobre o erro na pronunciación da palabra leva no texto a unha reflexión (entre uns nenos e a súa avoa) sobre a terrible realidade dos refuxiados. Destacamos deste texto, frente ó outro, a nota de esperanza.
Pareceume boa idea proporlles as dúas lecturas porque este gran problema debe ser tratado e abordado con toda a súa crueldade.
 Algún alumno quedou tan impresionado que non puido conter as bágoas.



X XORNADAS CLUB DE LECTURA

O pasado 17 de Xuño celebráronse en Santiago unhas Xornadas dos Clubs de lectura que tiveron como novidade a asistencia dunha chea de rapaces de moitos institutos de Galicia. Só eran unha pequena mostra do numerosísimo alumnado que ano tras ano se engancha á lectura, á charla, á reflexión... Alí puidemos constatar que somos un número crecente de persoas que comparten o amor polos libros e pola palabra.
Numerosos escritores, músicos, xornalistas., distintas propostas, experiencias... encheron un día do que a  pequena representación de Balbordo disfrutou totalmente.

Aquí a Galería de imaxes da páxina de BEscolares.

MENÚ DE ENGANOS. NUÑEZ SINGALA.



Repetimos en Balbordo no grupo de Pais, profes... unha lectura de Núñez Singala. 
Despois do noso agradable recordo da reunión de Instrucións para tomar un café, tocoulle o turno a Menú de enganos, libro no que falamos na cea de despedida do curso

Neste caso, preséntase o texto cunha carta moi especial: a dos 20 relatos organizados en:
"Para picar", "Entrantes", "Primeiros", "Segundos" e "Sobremesas".
Son textos de diferente extensión (curtos os "para picar" e máis densos, por exemplo, os "Segundos").
Moi entretidos, todos se relacionan dalgún xeito coa mentira ou o engano. Neles atopamos doses de humor, de reflexión, de crítica... e tamén grandes "porcións" de personaxes e situacións que lle dan moita variedade ó texto.
Recomendable para despedir o curso...

LA CENICIENTA QUE NO QUERÍA COMER PERDICES. N. LÓPEZ SALAMERO-M. CAMERO S.

Porque non todos os contos teñen que ter final feliz, porque non todas as mulleres senten a necesidade de estar na compañía dun home, porque o importante é a felicidade de cada unha e a liberdade de actuación, porque hai que revisar moitos tópicos sobre o amor... por moitas destas razóns considerei que este era un bo libro para ler e reflexionar cos alumnos do grupo de Pmar (todas mulleres menos un rapaz!). 
Foi unha moi interesante lectura e discusión para todos. Na editorial Planeta este álbum que desmonta tópicos.

EL LUGAR MÁS BONITO DEL MUNDO. ANN CAMERON

Pareceume absolutamente marabilloso este brevísimo libriño de Ann Cameron, editado en Alfaguara infantil e en Santillana, por iso o quixen compartir cos meus alumnos de Balbordo.
O protagonista é un neno, Juan, que foi abandonado, primeiro polo seu pai e logo pola nai, e vive en Guatemala coa súa avoa e outros familiares.
A súa forza de vontade, o seu optimismo e interés por aprender convírteno nunha figura entrañable, xunto coa  avoa que o coida. Fundamentalmente dos personaxes desta historia falamos en Balbordo.
Resaltamos esta cita que da título ó libro:
"...allí donde hay alguien a quien se quiere muchísimo y donde hay alguien que nos quiere de veras, ese sí que es el lugar más bonito del mundo". (Edit. Santillana, pág 62)

A DÚBIDA. M. REIMÓNDEZ

En Balbordo no grupo de pais, profesores... tivemos a sorte de reunirnos, o 18 de maio, con María Reimóndez para falar da súa novela gañadora do XIV Premio de Novela por entregas de La Voz de Galicia.
É un texto breve, áxil, ameno... que mantén a atención do lector ata ó final.
Charlamos de moitos temas presentes na obra: a pederastia, a corrupción, as relacións familiares, a violencia exercida contra a muller, os silencios da sociedade...
A vida aburrida e rutinaria dun matrimonio composto por un coñecido político e unha economista vese afectado pola detención do home, acusado de abusar dunha menor (filla duns amigos da familia). O desconcerto inicial da muller e as dúbidas sobre o que está pasando en realidade lévana a indagar sobre diferentes aspectos da súa personalidade e da súa relación de parella e a plantexarse moitos interrogantes sobre o seu marido, que terán que ser resoltos para atopar a verdade.
Grazas a María por acompañarnos!


UNHA ÚLTIMA CARTA. A. PAPATHEODOULOU- I.SAMARTZI


Este texto de A. Papatheodoulou e I. Samartzi que edita Kalandraka foi IX Premio Internacional Compostela para Álbum Ilustrado. Penso que as cartas son algo moi descoñecido para os máis novos, moi esquecido... por iso quixen escoller esta xoia de libro para facelos pensar sobre a súa importancia (nun pasado non moi lonxano) e, de paso, facer unha actividade lúdica.
Cunha presentación espectacular (é deses libros que dan ganas de tocalos só ó velos!) e cun texto claro, nostálxico, tenro... relátase o último día de traballo dun carteiro que leva moitos anos repartindo cartas nunha illa.
Palabras bonitas, desgrazas, ilusións, comunicación... que só o carteiro tiña na súa man nun tempo no que para comunicarse só había cartas.
Cun final precioso. Encantounos a todos.
E este foi o traballo que fixeron despois coas súas profes... Estaban emocionados coas cartas.

EL TESORO DE BARRACUDA. LLANOS CAMPOS

É un libro moi diferente ós que lemos este curso no grupo de alumnos de 1º ciclo de ESO.
Os protagonistas son uns piratas que non responden ás características que soen poseer estes personaxes. Son diferentes ós que coñecemos. O que máis nos sorprende do texto é que queren aprender a ler, desesperadamente... O primeiro descubremento do valor da lectura é un episodio moi gracioso porque significa o instante preciso no que se dan conta das portas que ese poder otorga ós que o dominan. Grazas a un libro atoparán as pistas para facerse cun preciado tesouro.
Un libro de Llanos Campos editado en El Barco de Vapor.

QUE LLE ACONTECE Á AVOA? WHAT'S WRONG WITH GRANDMA?- MIGUEL PERALTA-XOANA ÁLVAREZ

Álbum presentado en edición bilingüe (galego/inglés). Preciosas e suxestivas ilustracións en tonos marróns.
Narra a historia dunha avoa que ten nobelos de lá na cabaza. A súa neta, con gran tenrura, tenta que non se lle mixturen os recordos, desfacéndolle os nobelos.
Unha reflexión sobre a perda da memoria e a enfermidade do alzheimer, sobre o que estivemos reflexionando no grupo de PMAR. Especialmente meditamos sobre o importantes que son os recordos para cada un de nós.